BLOGGER TEMPLATES AND TWITTER BACKGROUNDS »

الاثنين، 14 سبتمبر 2009

اول رمضان




اول رمضان وهو معايا ومش معايا اتصل بيا اليوم اللي قبلة وقعد يكلمني ويقولي كل سنة وانتي حببتي كان نفسي اكون معاكي وتقعدي تحضريلي الاكل واقوللك حنفطر اية انهردة

او نعزم الناس في بيتنا ونبقي ملخومين وانا انادي عليكي اقوللك حببتي اقطعللك السلطة

رحت ضحكت مع اني حابسة دموعي

حسيتة هو كمان حابسهم زي

قلتلة انا كلمت ماما عشان اقولها كل سنة وهي طيبة لقيتة قالي انا حكلمها بعد مااخلص المكالمة قلتلة اوكي يا حبيبي

قالي انا بعتللك فلوس وصلتك قلتلة اة مكنش لية لازمة والله انا معايا اللي انت سايبهم مخلصوش قالي دية فلوس بتاعه الفانوس فضحكت تاني

وقعدت اسئلة صحتك وشغل بس حسيت بصوتة متغير اوي قلقني عليه

لقيتة بيقولي مش حتيجي بقا انتي وحشتيني

مقدرتش اخبي الدموع اللي حبساها

ولقتني بصحي من نومي وطلع حلم قلبي وجعني اوي اوي وقعدت ادور علي موبايل عشان اتصل بية

بس الوقت كان متاخر وقلت اكيد حيقلق فضلت صاحية جبت البوم الصور وقعدت اتفرج

وشغلت شريط فرحنا

انا حاسة ان قلبي متاخد مني الوقت اللي فات دة كانة مفتش كل يوم بيجي بحسة طويلللللللللللللللللل مبيخلصش

كل يوم بليل بنتكلم علي النت بس مبرداش يطول عشان شغل الصبح بدري وميتعبش وانا بقولة يالا قوم ببئا عيزاة يقولي لا مش حقوم عيزاة يفضل علي طول

وحشني صوتة وحشني هو

اول رمضان حيكون معايا ومش معايا

.

.

.

.

.

كل سنة وانتم طيبين

ووحشتوني

الجمعة، 13 مارس 2009

ذكرررررررريات



المشهد الحالي قاعدة ببكي ببكي وكاتمة صوتي من انه يطلع جوزي حيسافر ولسة راجع من برا بيحضر الورق وفي الاجراءات ربنا يوفقة يارب بس انا مبقاليش شهور عروسة مش قعدت في بيتي ولا قعدت معاه ولا كدة انتوا فهمني بس هو لما يسافر حروح عند بيت اهلي وكمان مش حيقدر ينزل اجازة قبل سنة الوضع بنسبالي صعب واهله اتصرف معاهم ازاي وحرجع تاني بيتنا واسيب بيتي انا لسة ملحقتش احفظ اركانة وتفاصيلة
قعدت افتكر زكريات الخطوبة والايام اللي فاتت ومشغلة اغنية وافتكرت
حياتي وهو مش فيها سنين عدت رضيت بيها وفاكر لو قابلت عنيه حياتي التانيه حعديها واديك يالي
افتكرت نسيت قابلتة الليلة واتهزيت طب ازاي في حاجات بتموت وتيجي الصدفة تحييها وافتكرت لما جت عيني في عينة سنيني معاة وافتكرت وعد كان بيني وبينة زمان خدناة وافتكرت مسكتة في ايدي وايدي خلاص سيباة
قصاد عيونة محتارة يقرب ولا يداري جة اليوم اللي اشوفه انا فيه ومنتكلمش ياخسارة تصعب عليا واعمل ايه مفيش في اديا شيء تاني
خلاص انا اسمي شفت عنية عشان دية بجد وحشاني وافتكرت عيني لما جت في عينة سنيني معاه وافتكرت وعد كان بيني وبينة زمان خدناة وافتكرت مسكتة في ايدي وخلاص سيباة
وبكيت بكي وحسيت اني في المطار وبودعة هو كان طالع من الاوضة بينادي عليا لقتني بجري واترمي في حضنة وكان شريط سينما افتكرت الزكريات افتكرت لما وعدني انة حيعمل كل حاجه عشان نكون مع بعض ومش يسبني افتكرت اول مرة شفته فيها وعملت تقيلة وهو جة كلمني افتكرت لما عيني جت في عينة واتكسفت وبصيت في الارض قعد يهدي فيا وقالي طب تعالي نخرج نتفسح
ودخلت البس وزعلانة من نفسي اوي اوي لاني بعمل علية ضغط نفسي ويسخر مني القدر جرانا مشغلين اغنية صوتها عالي سافر واتغرب وتعالي انا روحي معاك انا حفضل عايشة لهوانا وانا بستناك لية كتر الملامة سافر بسلامة ترجعلي وقلبك مشتاق ووحشني ياما حبك ياهوايا عايش هنا جوايا وحيكبر ويزيد لما انت ترجع بسلامة
رجعت من تاني ابكي وبحرقة واكتم صوتي بس بدات امسك نفسي ومسحت دموعي
وخرجت قلتلة انا بقيت كويسة قالي ملبستيش لية قلتلة لا خلاص خلينا في بيتنا قالي طب لية نخرج نتفسح قتلة لا انت تعبان لسة جي من برا قالي ملكيش دعوة انا عايز اخرج قلتلة لا بص انا حدخل احضرللك اكلة اية وناكل سوا وبعدين نبئا نشوف نخرج ولالا قالي طيب بس بردوا حنخرج
دخلت مطبخ تلفون رن هو رد الووووووو طبعا مين عرفنهاااااااااااااا هادمة الملذات ومفرقة الجماعات بنت خالتو بصراحه ربنا بقيت حاسة انها عايشة معانا ولا بتطلعي امتي ولية مش عارفه وبصراحه مش نقصاها ولا وقتها خالص معايا طلعت شورتلة
انة يقولها مشغولة او اي حاجه وهو كمان حسيت انة مش فضيلها وعياطي اثر فيه وخلاه مضايق
نسيت اقولكم اننا اتخنقنا ودة سبب غيابي وعدم ردي علي الكومنتات اعذروني لانة شافني وانا قاعدة ولما سالني فقلتلة وقرا اللي كتبتة واضايق واتخانقنا وبصراحه هو متفاهم جدا وبعد كدة اتفاهمنا ان طالما اني برتاح بكتابة وكمان عجبة اسلوبي جدا واقعد
واقعد يشجعني ومن كتر تشجيع حيدخل يعلق معاكم فخلوا بالكم من الحكومةةةةةةةةةةةةةةةةةةةةةةةةةة الله يخليكم
مهم اكلنا وقعدت اضحك واهزر عشان انسية بس علي مين بردوا خرجنا وكان يوم
حلو بصراحه بس بردوا احساسي بان الايام بتقل وحيسافر برجع اضايق ادعولي

الخميس، 5 مارس 2009

مشاكل من اولها









انهردة يوم 22 في الشهر سنة 1988
صحيت الصبح زي اي يوم عادي وروقت البيت
واستحميت وقرايب جم لان انهردة الفرح
بس كانة يوم عادي اخويا اتخانق معايا لانه مش متخيلني حبعد
احساسين متناقضين فرح وحزن عميق فرح لانهة انهرددة الفرح وحزن لفراق اغلي واحب واعز الناس
امي روحت الكوافير ولبست الفستان الابيض عنيا اتملت بدموع
جة عريسي اخدني رحنا الاستوديو اتصورت اتنقلنا للقاعه وفي طريق دار حوار بيني وبينة
اخيرا يااااااااااااااة كانة حلم انتي عارفه انك جميلة اوي في الفستان الابيض من انهردة بقيتي حرم الاستاذ/.......
وتظهر ابتسامة وراها حزن وقلق تبدا الزغاريط اغاني وفرحه وبدات انسي واعيش الدنيا
وابئا في عالم تاني عالم انا وهو بس طول الوقت بفكر في بكرة بفكر اللحظة اللي جاية
كل دة كان كلام ماما ليا واعادت ذكريات فرحها وخبرتها وبدات في نصايحها
وكل دة بسبب مرور زوجي الغالي بضائقه ماليه برغم اني مش بحب ادخل حد في اموري العائلية
لان نتائجة دائما بلسلب لكن من كتر ما ضاقت نفسي معرفتش اخبي دة علي وشي وامي عرفت علي طول
وبدات تستعيد ذكريات من غير متعرف السبب وافتكرت في الاول ان اتخانقنا او حد زعلني من اهله
ولكن مقدرتش اسكت وبدات ابكي وزاد قلقها عليا فحكيتلها فعرضت انها تسلفني وانا رفضت بشدة انا مش بحب السلف ابدا ولا الدين محدش عالم بكرة حيكون ازاي وكمان لاني مش عارفه حقدر اسدهم امتي وكمان احنا في اول حياتنا مينفعش نخلية منهج لينا يمكن يكون كلام في الاول وحماسة بس بحاول يكون واقع
بدات تريحيني وذكرتني بموقف مشابة حصل لابي وقد كان انها محكتش لحد وباعت دهبها شبكة ودهبا الخاص واعطتتلة الفلوس وقالتلة ان دية فلوسة من الاول ورجعتلة ولما ربنا يكرمه اكيد حيعوضها
وكان فعلا انا فاكرة ان والدي اول حاجة عملها بعد ان زاح ربنا عنه الضائقه مالية بانه اشتري دهب لولدتتي وفتح حساب باسمها
وعليه قمت بنفس الفعل اتصلت بزوجي قلتلة اني حتاخر عند ماما وسالتة قدرت تتصرف فلقيت صوتة ضاق وحسيت بحزن فقلتلة خير ان شاء الله وبسرعه رحت بعت دهب واستنيتة ولما جه اتفؤجا وسالني حبتهم منين فقلتلة دية فلوسك ومستلفتش من حد فاستغرب بص علي ايدي ملقاش الاسورة اللي بلبسها دايما فعرف اني بعت
وزعل جدا وحسيت اني شيلتة هم اكبر بس بدات اتكلم بهدوء عن مدي حبي ليه واني عارفة انة حيعوضني

لقيتة باس ايدي وقالي ربنا يخليكي ليا وبدعي من كل قلبي ان ربنا يكرمني عشان اعوضك
فابتسمت وقلتلة اتفضل بئا غير هدومك عشان تتغدي ويارب الاكل يعجبك وعلي فكرة انا كلمت ممتك قالي ليه قلتلة عشان اعرف وصفة الاكل عشان اطبخللك زيها عشان بحبك فبحب اعمل اللي بتحبة
فحسيت انة فرح اكتر وبقيت مبسوطة اكتر
صلي العصر وصليت معاة وبعديها اتغدينا
وكان اليوم سعيد ولكن في اليوم اللي بعدة بعد مغرب تجيلي مكالمة من بنت خالتة اه هي تاني جب حطاني في دماغها بئا مش عارفه
اصل والدتت زوجي عرفت بلي عملتة فقالت لبنت خالتة
فبتتصل تقولي اة شاطرة انك بعتي وقفتي جمبة بس مش خسارة الدهب كنتي تقوليلي كنت اشتريتة منك لو حتبيعي حاجه تاني قوليلي اشترية
الناس لبعضيها بردوا
وكان هذا الكلام كفعل الصاعقة عليا
ومعرفتش اتصرف او ارد غير اني قلتلة معلش الباب بيخبط حروح افتح وحكلمك بعدها
ونهيت مكالمة وكان هذا هو تصرفي الغير طبيعي بلنسبة لوحدة قوية ومفترية زي
هديت بدات افكر اة بتغيظيني اة شغل ستات اة جوزي واثقة منة ومن حبة بس لية افضل في حرق دم دة بسببها
انا مش حتصرف معاها دلوقتي عشان ظروف زوجي وحالتة نفسية وحصبر بس مش حعديها بساهل
ولا انتم رئيكم ايه وكمان رئيكم اية فانه حكي لحماتي ماما تانية ؟؟؟؟؟؟؟؟؟؟
حستني رئيكم



**انا مضايقة جوزي مسافر سامعه ناس هو انتوا لحقتوا اةةة منا بقول كدة برضوا بس دة شغل في بلد عربي وانتوا عارفين الدنيا هناك صعبة بعد الاقتصاد وانهيارة وبرغم دة جتلة وظيفه كويسة هناك قولولي اعمل ايه بس انا مش حطول في البوست وحقولكم البوست اللي جاي***

اول يوم




في اول يوم جواز
الخجل مسيطر عليا
قلق وخوف ماليني
سمعت كتير بس مش عارفه فجاة بقيت في دنيا جديدة
مع راجل كنت بحبة بس دلوقتي بئا جوزي
صحيت من النوم بفتح عنيا بصيت لسقف بصيت جمبي لقيتة
ابتسمت حطيت المخدة فوق راسي
اتمطعت وفرحة واحساس جديد حسيتة
قمت سرحت شعري ولبست هدوم وحطيت برفان وقعدت افكر وافتكر وكانة شريط سينما الفرح ذكريات الخطوبة وامبارح
وجوزي وبصيت في ايدي لقيت دبلة انا مش بحلم قمت حضرت الفطار اخدت وردة ومشيتها علي وشة وبوستة في خدة وقلتة صباح الخير يا حبيبي
قوم عشان تفطر
بصلي وابتسم قام وقبل مايفطر صلينا وكنت طايرة بدات اصدق اني في بيتي
الباب خبط فتحت اهلي واهلة جم وكل الفرحة اللي فيا اتغيرت
جت بنت خالتة وكانت بتحبة ونفسها تتجوزة بدات تبصلة وتبصلي وعنيها كلها حسد
بدات اضايق قعدت ولاني اول يوم جواز اتلخبطت اخته قالتلي مش حتضيفينا
فتكسفت وقمت حضرت حاجات للضيافه سالوني فين العريس قلتلهم بيلبس وجي
شفت ضحكات وابتسامات وغمزات فضايقت ووشي احمر
قعدوا معانا لغاية المغرب بقيت متلخبطة اكتر دخلت اطبخ
كنت بطبخ في بيتنا بس دلوقتي بطبخ في بيتي خايفة الاكل ميعجبهمش
كنت مرتبكة جدا
جم ينزلوا سلمت عليهم وسلمت علي بنت خلتة برغم اني كنت سمعه ضحكاتها عالية وانا في المطبخ
من حقي اغير لانة جوزي وحبيبي وانا واثقة فيه
بس بعد يومين اتصلت تاني وكانها بقت تحبني فجاة وقعدت تديني نصايح
وقعدت تقولي انا مش عايزة ازعللك اصل الاكل معجبهمش وكمان انتي عايزة تخدي باللك من البيت شوية
طب هو انا لحقت دة كان اول يوم
جينا نخرج وكانت اول زيارة لاهله طبعا
رحت سلمت علي حماتي وبقولها ياماما بوستها وافتكرت كلام ماما ليا اني اكون حذرة معها واكسبها
الست كانت كويسة بس اختة علقت علي هدومي وقالتلي هو مقلكيش حاجه علي الهدوم قلتلها لا
قالتلي ازاي
جينا بناكل فبياكلني لقتها قالت دة انت مدلعها خالص هو كدة بس في الاول وبعدين وبدات تضحك
اضايقت تاني وسكت
بدات افكر انا اللي قوية ومفترية انا اللي خلاة يحبني قوة شخصيتي فيا
اسكت
واصبر
ولا اتكلم واعمل ثورة حرية
سكت من حبة ليا
عذرت لان مينفعش يتكلم وقتها
حيقولوا اتغير
حيقولوا مش صغير
وهي غيرته
سكت وصبرت وكان حل مؤقت
روحت بيتنا وبفكر ياتري حنتغير بعد كام شهر وحيبئا لقبي زوجة عادية
وكل حبة ليا حيبئا ذكري وينسي
وحبي ليه حيفضل في قلبي وساكتة
وحتوة بين المطبخ واكل وعيال وبيت
وحطخن ويكرة شكلي وميبئاش نظرة ليا
انا مش بحلم بكدة انا حلمي غير كدة بحلم يرزقني ربي ب 4 عيال ولدين وينتين
واملي البيت شقاوة عيال
عيال ذكية عيال شقية حبهم في قلب ابوهم وغلاوتهم فيا
يطلعوا شاطرين يطلعوا حلوين
ويقولوا ربوا
وناس حاسدين
نفسي ابئا صحبتهم
واخواتهم الولاد صحابهم يحكولي عن حبايبهم واروح اخطبهم
واقف في وسط الفرح ام صغيرة ناس باصة وتقول يادي الهنا
الام جميلة وعيالها قمر
وجوزي حبيبي كل يوم اروحلة في بريك الشغل نتغدي
واروح اتصل بية وهو في الشغل اقولة وحشتني
يمكن رومانسية بس بحلم بانها تكون واقعية
دة مش مستحيل
مش بحلم بتغيير
بحلم بتفاهم طويل
بحلم بنظرة نتفاهم
بحلم ببكرة
يكون احلي
ياتري ينفع؟؟؟؟؟؟؟؟ياتري اية المستحيل في ان يكون بيتي كدة وحياتي كدة ياتري لما تواجهنا مشكله نتصرف ازاي واية هي المشكلة اللي نقف ودامها عاجزين وتدمر قلبنا؟؟؟؟؟؟؟؟؟؟؟؟؟؟

الأربعاء، 4 مارس 2009

مشاكل ما بعد الحب وشهر العسل





انا عروسة شابة متجوزة من شاب بعد قصة حب شنيعه قطعنا بعض حب وبعدين واجهنا العيلتين بحبنا وققفنا ودام العقبات من الاخر كافحنا

بعد مرور شهر وبعد منتهي الحب والرومانسية كان الحال اني واقفة في مطبخ بعيط من تخريط البصل مفيش خروج مفيش فسح ولا في عيال تسليني منا ملحقتش بس سوسن بنت خالتي حامل ومتجوزة بعدي حماتي اللي مفيش منها اتنين طيبة وكويسة بس كل يوم جوزي بيروحلها ويتغدي طب انا بطبخ لمين بستني مين لما فضفت لاختي قالتلي دة ابن امه انا مصدقتش وقعدت اقول كلا وبتا هو طيب بحبه وبيحبني اية المشكلة المشكلة اني بقيت متجوزة الشقه وعفشها وحيطانها بقيت بخاف وبنور الشقة كلها لغاية ميرجع بليل هو مش بيخلص شغلة بليل بس بيقعد مع صحابة علي القهوة ولو قعد في البيت بيتفرج علي المتش عارفة ان ناس حتقول لو لقي اللي يشغلة فيا مكنش عمل كدة لا انا عملت كل حاجه بس احساس ملل بينا مش عارفه ملل اية اللي بعد شهر انا مكنتش بحلم ان يكون جوازنا كدة انا شخصية اجتماعية وهو شخص هادي مش بيحب الزيارات وخلافة الا في اضيق الحدود وكنت فكرة اني حغيرة





والحل يادكتور شعري يادكتور شعري

"هي دة المشكلة بنحب اللي ودامنا وبنشوف عيوبة ونقول حنغيرها ونتغاضي عنها في الخطوبة واول شهور الجواز ونرجع نقول مش عارفين نغير لو نقدر نغير نفسنا اللي ودامنا حيتغير ويانحب اللي ودامنا بعيوبة وبحلوة ومرة يا منحبش حد وفاكرين انة حيتغير"